TAGBILARAN CITY, Bohol, Nov. 18 (PIA) -- Usa ka multisectoral forum kabahin sa mga epekto sa paghugpong sa mga nasud sa Asya ang ipahigayon karong Biyernes, Nobyembre 22 sa buntag, didto sa Pavillion sa Bellevue Hotel sa Panglao.

Ang forum magasaysay sa mga epekto sa pagbukas sa mga utlanan sa mga nasud nga sakop sa Association of South East Asian Nations (ASEAN), atul na usab sa ipahigayon nga pagtigum sa usa ka komitiba sa ASEAN Senior Officials and Ministers Responsible for Information (SOMRI) dinhi sa Bohol sugod Nobyembre 19-22.

Usa ka opisyal sa Department of Foreign Affairs ang magbatbat sa mga kahigayunan nga nabuksan sa pag-hugpong sa ASEAN, samtang isaysay usab didto ang dili hingtupngan nga biodiversity sa mga nasud sa Asya ilabi na niadtong mga nasakop sa ASEAN ug ang mga silinganan niini.

Hisgutan usab didto sa taga Department of Tourism ang mga kahigayunan sa kapanarbaho-an ug kanegosyohan sa ASEAN samtang isaysay usab sa Department of Trade and Industry ang epekto sa ekonomiya ilabi na ngadto sa mga ginagmay nga mga mamumuhunan nga Bol-anon.

Sa nahisgutan nga multi-sectoral forum, gipaabut nga ikauban usab sa mga Bol-anon sila Presidential Communications Operations Office Undersecretary Lorraine Marie Baduy ug si Usec. George Apacible.

Sa Multisectoral Forum, gipaabut nga may mga sakop sa media, information officers, mga sakop sa chambers of commerce ug mga negosyante, mga taga academe ug mga estudyante ang maapil.

Ang Multisectoral forum maoy mag-tak-op sa tulo ka adlaw nga opisyal nga tigum sa mga ministers of Information sa mga nasud sa ASEAN. (rahc/PIA7/Bohol)